Dr.Mini S on Clubhouse

Bio

സരൂപ

അധ്യാപിക
"മനുഷ്യൻ എന്ന ലഹരിയിൽ "
(കവിതാസമാഹാരം )ഫേബിയൻ ബുക്സ്.

മരണം നിറച്ച കവർ
--------

ഇന്നു വൈകുന്നേരത്തെ
ചായയ്ക്കൊപ്പം
അവൾക്ക് കൊറിക്കാനുള്ള
കപ്പലണ്ടി
ആറു മാസം മുൻപ്
കവറിനുള്ളിൽ നിറച്ച
മനുഷ്യൻ
ഇന്ന് വൈകുന്നേരം
കൃത്യം മൂന്നു മണിക്ക്
അവളത്
കൊറിച്ചുകൊണ്ടിരിക്കുമ്പോൾ
മരിച്ചുപോയി.

അവളോ അയാളോ
പരസ്പരം അതറിയുന്നില്ല.
അവളപ്പോൾ ഭക്ഷണത്തിലും
അയാൾ മരണത്തിലും
ദത്തശ്രദ്ധരായിരുന്നല്ലോ.
നാട്ടിലപ്പോൾ ആരെല്ലാം
ഭക്ഷണം കഴിക്കുന്നുണ്ടാവും,
കുളിക്കുന്നുണ്ടാവും,
ഇണചേരുന്നുണ്ടാവും..
മരണത്തിന് മാത്രമായൊരു
സമയമില്ല..

എന്നാലിതങ്ങനെയല്ലല്ലോ
ആറുമാസം മുൻപയാൾ
സ്വയമറിയാതെ
തൻ്റെ മരണ സമയത്തെ
ആ കവറിനുള്ളിൽ
ഒന്ന് തൊട്ടിരുന്നു.
ഭാവിയിൽ കൊത്താൻ സാധ്യതയുള്ള
ഒരു പാമ്പ്
ഇന്ന് നിങ്ങൾ
വണ്ടി കാത്തുനിൽക്കുമ്പോൾ
റോഡ് മുറിച്ച്
കടന്നു പോകും പോലെ....

ഓർത്തു നോക്കുമ്പോൾ
തൻ്റെ മരണ ദിവസത്തെ
നിറച്ചൊരു കവർ
അയാൾ അന്നേ
തയ്യാറാക്കുകയായിരുന്നു.
നമ്മൾ ഓരോരുത്തരും
നിറച്ചു വയ്ക്കുന്നുണ്ടാവും
ഒരു മാസമോ
രണ്ടു ദിവസമോ
പത്തു വർഷമോ
അടുത്ത നിമിഷമോ
ആരെങ്കിലും
പൊട്ടിച്ചു കൊറിക്കാൻ
പാകത്തിന്
നമ്മുടെ
മരണ സമയത്തെ .
സരൂപ