ƦƲƊƦƛ ƇӇƲƬíƛ on Clubhouse

Bio

@@ বৰষুণজাক নহা হ'লেই ভাল আছিল @@

মোৰ আকাশে উচুপে
তোমাৰ শূন্যতাত
যেতিয়াই মন যায় হুৰমুৰকৈ
নামি আহে বৰষুণ এজাক

পাখিলগা ডেউকাৰ সুখৰ সপোন
খহি পৰে দেওলগা পথাৰত

ধাৰাসাৰ বৰষুণে ধুই নিয়া
অঘৰি নদীৰ ঘাটত
শূন্যতা পুৰাবলৈ আবৃত্তি কৰিছো
কেৱল শোকৰ মালিতা

এনাজৰি ছিঙা বঙহৰ মঙহ
দুখৰ বোকাৰ ছিটিকনি
উর্মিলা সপোনে ৰৈ ৰৈ উচুপে
অনুভৱৰ শূন্যতাত
বুকুৰ চৰাইজনি ও আনমনা

কেনেকৈ পঢ়িবা তুমি
উপলা নদীৰ প্ৰেমৰ কবিতা

তোমাৰ চকুৰ নীলাৰে
যদিহে গাভৰু হয় নদী
চপৰা-চপৰে হব গৰাখহনীয়া
আৰু নিচুকনি গীত শুনি
উচুপি উঠিব ভাটিয়ালী সুৰ

ওৰেটো ৰাতি আঁকিলো
তোমাৰ ছবি
সপোনৰ বন্যাই ধুই নিয়ে
হৃদয়ত পাহ মেলা ৰামধেনু প্ৰিতি

বৰষুণজাক
নহা হ'লেই ভাল আছিল
কম্পাচৰ কাঁটাৰে জুখি জুখি
চকুৰ ইংগিততে হ'লোহেঁতেন কথা
অ...লে...খ কথা...
যোৱা ৰাতিৰ কথাবোৰ
আন্ধাৰ অৰণ্যত
সৰি পৰা সৰাপাতবোৰ
দ নে বাম
উভতি খোজ লোৱা বাটটিৰ বিষাদৰ গভীৰতা কিমান---

মুখামুখি হ'লেই সুধিম তোমাক

সহজতে হেৰাই গ'লেও
সহজ নহয় পাহৰা
মাটি মাটি পলসুৱা গোন্ধ
আৰু উৱলি যোৱা সপোনৰ ঘৰ

বৰষুণজাক
নহা হ'লেই ভাল আছিল
কমলা কুঁৱৰীৰ ইননি-বিননি
সর্গদেউৰ পুখুৰীত এঠুঁতৰি পানী

বৰষুণজাক নহা হ'লেই ভাল আছিল |