Bk S on Clubhouse

Bio

പ്രവാസിയുടെ വീട്

ഒരു കണ്ണിൽ
ഒരായിരം കണ്ണുകൾ
തുറന്നിട്ട്
കാത്തിരിക്കുന്നുണ്ട്
ഓരോ പ്രവാസിയുടെ
വീടും

ഓർമ്മകളുടെ
അസ്ഥിവാരം
അതിനെ
സുരക്ഷിതമാക്കുന്നുണ്ടെങ്കിലും
മൗനങ്ങളുടെ ജാലക കമ്പികളിൽ
ഉദിക്കാതെ പോകുന്നുണ്ട്
ചില കടങ്ങൾ

ആയുസിനെ
മരുക്കാറ്റ്
കരണ്ടുതിന്നുമ്പോഴും
സ്വപ്നങ്ങളിൽ നിന്നൊരു
പരിഭവം അടുക്കളയിൽ
ഉപ്പായോ
കടുകയോ
തിളപ്പിലേക്ക്
നാവു നീട്ടുന്നുണ്ട്

പലിശക്കാരൻ
ചിട്ടിക്കാരൻ
പത്രക്കാരൻ
മീൻകാരൻ
ബാങ്ക് മാനേജർ
ഇവരുടെയൊക്കെ
തുറിച്ച കൊമ്പുള്ള
നോട്ടങ്ങൾ ഭിത്തിയിലെ
കലണ്ടറിൽ
അമാവാസികളായി
അടയാളപ്പെടുന്നുണ്ട്

മരുഭൂമിക്കും
കടലിന്നുമിടയിൽ
അപ്പുപ്പൻ താടികൾ പോലെ
ഒഴുകി നടക്കുന്നുണ്ട് മേൽക്കൂരകൾ

കിടപ്പറയിൽ
ഒരു നദി
ലിപികളില്ലാത്ത ഭാഷയിൽ
കുമ്പസരിക്കുന്നുണ്ട്
വേരുകളിൽ
പൂവുകളുള്ള
ഒരു ജീവിതത്തെക്കുറിച്ച്

ഒരിക്കലും
പണിതീരാത്ത
വീടാണ്
മിത്രമെ
ഓരോ പ്രവാസവും!

പവിത്രൻ തീക്കുനി