balaynash Desta on Clubhouse

Bio

✍️ ፈሶ ወደ ሰማይ
************************
የተላጠ ጀርባህ ፣ የተገሸለጠው
ለጨካኞች ጅራፍ ፣ ታልፎ የተሰጠው
የተተለተለው ፣ በደም አሸብርቆ
የሚታይ ገላህ ፣ ከገላዎች ልቆ
በኃጢአተኞች እጅ ፣ እየተዋረደ
ምህረት አዝንቦ ፣ ፍቅር ያዥጎደጎደ
ጭንቀትና ስቃይ ፣ ዝምታ በአንድ ላይ
የተቆለለብህ ፣ በማይስብ መልክህ ላይ
ወደኸኝ ነውና ፣ ልሙትለት ብለህ
እንኳን ስቃይ ገባህ ፣ እንኳን ጭንቅ አለህ
አባትህ ነውና ፣ ጨክኖ የገደለህ
ኤሎሄ ኤሎሄ ፣ ስትለው ዝም ያለህ
ምነው የዛን ጊዜ ፣ በሰማህ አልልም
አንተ ባትሞት ኑሮ ፣ እኔ ልጅ አልሆንም
ምነው የዛን ጊዜ ፣ ወይ ባለህ አልልም
አንተ ባትቆስልልኝ ፣ የኔ ቁስል አይድንም
እንደውም እንደውም ፣ እንኳንም አልሰማህ
እንኳንም ተላጠ ፣ እንኳን ደማ ጀርባህ
እንደውም እንደውም ፣ እንኳን ወይ አላለህ
እንኳን አደቀቀህ ፣ እንኳን አቆሰለህ
ባትጨነቅ ኑሮ
ባትወጋ ኑሮ
ባትገረፍ ኑሮ
ባያደቅህ ኑሮ
አንተ ባትሰቀል ፣ ተተክተህ በ'ኔ
አንፋታም ነበር ፣ እኔና ኩነኔ
ይብላኝ እንጂ ለሞት ፣ አንተ እንኳን ተሰቀልክ
መልክህን እንድይዝ ፣ እንኳን መልኬን መሰልክ
ከአባትህ ዕቅፍ ፣ እንኳን ወ'ተህ መጣህ
እንኳን ባልሰራኸው ፣ ቅጣቴን ተቀጣህ
በፍቅር እያየህ ፣ ወንድሜ ልትለኝ
ከወዳጅ የሚበልጥ ፣ ወዳጅ ልትሆነኝ
እዛ መስቀሉ ላይ ፣ ተቸንክረህ ሳለ
እዛ መስቀሉ ላይ ፣ ደምህ ሲፈስ ሳለ
እዛ መስቀሉ ላይ ፣ እያማጥክ ሳለ
እዛ መስቀሉ ላይ ፣ ዝለህ ደክመህ ሳለ
ይቅር በለው እያልክ ፣ የበዛ በደሌን
የጠራኸው አንተ ፣ አቤት ያለው እኔን
በእኔ ህመም ቆስለህ ፣ እያከምክ ቁስሌን
ኤሎሄ ያልከው አንተ ፣ አቤት ያለው እኔን

እናማ ምን ሆነ......
በእርግማን ሞትህ ፣ በረከት ሆነኸኝ
ከጽዮን መጥተህ ፣ ከሲዖል ነጥቀኸኝ
በአብ ቀኝ ተገኘሁ ፣ ሞትን ዳግም ላላይ
የደምህ ጅረቱ ፣ ፈሶ ወደ ሰማይ