ഹരിതം
............................
തിരിയൽതന്നെ നിന്നരികിലായ് ഹോ
ഞാൻ ഭൂമി, നീയെൻ സൂര്യൻ!
പകലുദിച്ച്, രാനിലാവുപോൽ പി-
ന്നിരുളു നീക്കുമെൻ താരം!
അറിഞ്ഞുഞാൻ നിൻവരവിലെന്നിൽ,
തീനാമ്പിടുന്ന പനിമുകുളം!
പടർന്നുവന്നതിലാണ്ടു ഞാനെൻ,
മണി ദിനമൊരുക്കുംന്നേരം!
ഇടയതൊട്ടും കളയാതെന്നെ നീ,
മിഴിയെറിഞ്ഞൊരാൾ ദൂരം!
ഭ്രമണമെന്നുമെൻ പ്രണയമെങ്കിൽ
നീ, മെയ്കുഴയാ-തിരനോട്ടം!
ഒഴുകിവന്നൊരു കടലുഞാനെൻ്റെ,
മുകളിൽ നീ നിൽക്ക വാനം!
ഒന്നുതലോടി വാർന്നു തൊട്ടിടാൻ,
നീർവിരലുപോലെ നീ മേഘം!
തഴുകിഞാനെന്നും ഉയിരുനൽകും ഹോ,
പറന്നുപോം വെറും വായു!
ഇളംചൂടിലുടൽ വെയിലുപായിച്ചു നീ
കളിപകർന്നതിൻ ആട്ടം,
എൻമിടിപ്പിൽ അതേതുടിപ്പാലുണ്ടിതാ,
ഇടുപ്പിൽ ഇരുന്നുനിൻ പൈതൽ
ചിരിക്കയല്ലേ? നാം വിയർത്തതല്ലേ,
നാൾ ഹരിതമേ ഇതുകാലം!
...............................
അനിൽ പുതുവയൽ