طايش اون لاين on Clubhouse
Bio
سؤال للناس اللي بتشعر بالعزة والكرامة هاليومين:
هل بيستمر شعورك بالعزة والكرامة وانت واقف طابور قدام سوبر ماركت بابه مسكر، وانت بتستنى يفتح بعد ساعة أو ساعتين عشان تشتري كيلو سكر وقنية زيت وكيس بامبرز بسعر مبالغ فيه بناء على إعلان من وزارة الاقتصاد، ولكنه أقل من أسعار السوق السودا؟
هل بيستمر شعورك بالعزة والكرامة وانت بتلف من حارة لحارة تدور على حد بيعبي غاز عشان جرتك فضيت ومش عارف كيف تطبخ أكل لولادك، ولو لقيت غاز بتلاقي الكيلو بينباع ب25 أو 30 شيكل، يعني الجرة بتعبيها ب300 شيكل او ما يعادل 80 دولار؟
هل بيضل ملازمك هالشعور بالعزة والكرامة وانت واقف طابور مهين ومذل في مدارس الوكالة عشان تاخد 3 بصلات ولفة مناديل للتواليت ويمكن معهم بيضتين او 3 بيضات من ضمن ما يسمى بالإيواء الخارجي؟
هل بتشوف العزة والكرامة في عيون الناس اللي واقفين قدام التكيات بطناجرهم وصحونهم والعلب المعدنية والبلاستيكية وبينهم اطفال وسيدات حافيين عشان يطلعوا بوجبة تسد جوعتهم وتستر فقرهم ومعاناتهم؟
هل ضل في عزة وكرامة والناس بتشوف أسعار الخضروات كل يوم بتزيد عن اليوم اللي قبله وفي عنيهم نظرات العجز والقهر ومش قادرين يشتروا اشي يطبخوه؟
هل هدا الشعور بيضل معك وانت متشعبط في سيارة نص نقل وواقف على رجل واحدة وبتدعي يا رب ما تقلب فيكم السيارة وانت رايح مشوار تجيب كوبونة أو تقضي مصلحة؟
هل وانت ماشي في الشوارع فوق المجاري والنجاسات وبتمشي على طراطيف اصابعك عشان ما تغرق وما تتلوث وما يتوسخوا ملابسك - على الأقل عشان تعرف تصلي على طهارة - هل بيطغى عليك شعور العزة والكرامة وبينسيك القرف اللي تحت رجليك؟
هل بتشعر بالعزة والكرامة وانت -شبه يوميا - بتسمع ناس بتكفر بالله سبحانه وتعالى وبتسب الدين وبتنهش في بعضها من شدة الضيق؟
هل بتضل تشعر بالعزة والكرامة وانت بتشوف انه في قيادات او متنفذين بيصلهم كل اشي ناقصك وهو قاعد في بيته أو خيمته وما بيعيش ثانية واحدة من معاناتك ولا بيعرف ايش معنى كلمة طابور أو سوق سودا أو شعبطة أو معاناة؟
نفسي حد يجاوبني، بشرط يكون عايش معنا في قطاع غزة،
يمكن انا بشوفش، أو مش فاهم، أو نظرات الناس ووجوههم خداعة.
#حرب_غزة_2023
