يوميات أم مطحونة on Clubhouse
Description
نصيحه لكل ام
عارفة انك سمعاني كويس وشبه مقتنعة بس حبيت اشهد عليكي أمة لا اله الا الله
المدارس ابتدت وهتبتدي تذاكري للولاد.. وماله..
الجرأة حلوة مفيش كلام
لا هو عيب و لا حرام الموضوع مش أزمة خالص
بصي يا ستي دي تعليمات بسيطة للمذاكرة.
- افتكري ان ده ابنك ضناكي حتة منك ما تخليش حاجة تافه تخسركوا بعض..مش ده ابنك البكري اللي اتمنتيه
مش ده اللي كنتي بتقولي امتي يكبر بقي وكنتي بتعدي الأيام عشان تخلصي من الرضاعة و التكريع و البامبرز...
اهو كبر...و مطلع تربانتينك اهو... و بتقولي في سرك و لا يوم من ايام الأشط يا حبيبي! نرجع للمذاكرة
- حاولي تختاري الوقت المناسب..لأنه بعد ما بيرجع من المدرسة بيكون تعبان و بعد ما بيتغدي بيتقل و بعد ما بينام الضهر بيقوم وخمان..و بعد ما بيستحمي بيعوز يريح..اختاري وقت غير دول!!!! هيبقي مصحصح و مفوق معاكي..
- خرجي أي أطفال من أوضة المذاكرة عشان فجأة هيحب أخوه اللي كان لسه مديه شالوت و ملبسه في الحيطة ... و هيكتشف فجأة ان عنده أخ اصغر منه و هيتفاجئ أكتر ان اسمه آدم و انه عايش معاكوا بقاله 3 سنين... سبحان الله !!!!
- خلي قلة مياه جنبك أو زير أو كولدير... حسب المتوافر..لأنه هيعطش 50 مرة...
بس حاسبي تتهوري..بلاش قلة لحسن الشيطان شاطر..
- خلي جنبكوا عجل ..ادبحوا تيس...حمريله ديك رومي...عشان هيجوع منك 100 مرة...مرة تديله فخدة العجل..مرة ورك الديك...عشان تخلصي من زنه..
- ذاكري في أوضة جنب التواليت عشان هيتزنق منك 15 مرة.. و ممكن يجيله جفاف فا خلي معاكي محلول..
- شيلي أي حاجة من قدامه خلي المكتب أقرع خالص
- ما تضيعيش شقي عمرك هيلزقهملك في قفا اخواته...
- قولي المعلومة 20 مرة..و الله ما هيجرا حاجة..قوليها بصدر رحب و انتي مفرفشة كده بدل ما تخسروا بعض علي مادة ما تستاهلش أصلاً..
استحضري فرفشة الفنانة فيفي عبده في فيديوهاتها بتاعة ٥ امووووواه..٥ هوانيوووووو... هتفرق معاكي اوي
جو التحفيز بالشكولاتة و الكاندي ده بقي فاكس أوي شجعيه وقوليله لو خلصنا الهوم ورك هنحرق الكتاب ياحبيبي هيبقي فورييرة
- اقفلوا التلفزيون في البيت كله و ما تخليش حد يتكلم عشان هو راشق ودنه في أي حوار
اوعي تقوليله ان التيتشر قالت حاجة غلط...كله الا كلام التيتشر...لو قالت وردة يعني apple.. تبقي apple...
ما تستغربيش من جو الحنان المفاجئ المفرط و المشاعر الجياشة اللي بتهب فجأة دي..و انتوا بتحلوا الواجب يقوم يبوس ايدك ورجل أخوه..كل ده متوقع..
الحب ولع في الدرة..
- حاولي تنجزي عشان ابنك مش ثانوية عامة..و عشان مرارتك و صحتك و عشان المشوار لسه طويل..
- لو لقيتي اي اعراض غريبة عندك زغللة هزيان تهتهة بتعرجي ظهور ميول انتحارية روحي للدكتور علطول انتي ملكيش صاحب و اللا ايه؟؟ انتي روح بردك .
وأخيرًا الClub هنا عشان تفصلي شوية من وجع القلب
